مقارنة بين السعودي والأجنبي (في الطلعات)

ياجماعه اوقات الواحد تجي براسه مقارنات يحس بآخرها انه كان مظلوم او بعنى اخر انه كان يضحك على حاله على باله انه في قمة السعاده, ماراح اطول

في الكلام بخليها مقارنه بسيطه وانتوا قرروا:

المقارنه راح تكون عن الرحلات وترتيبها بين ربعنا و الاجنبي , اترككم مع المقارنه

قبل الرحلة:

الاجنبي مرتب للرحله مع اولاده قبلها باسبوع ع الاقل .

ربعنا: اذا رجع من الدوام وهو مروق , اعلن مكرمته (بكره بنطلع رحله ) مع العلم الاولاد لهم شهر يطلبونه.


ليله تصبح الرحلة:

الاجنبي: الاغراض جاهزة وحاطها بكراتينها ونايمين بدري بس يجي الصباح يحمل ويحرك.

ربعنا: حالة استنفار الام تجهز والاب يشتري مقاضي(اهم شي التيس ) والاولاد للحين ماهم مصدقين من هول الصدمه


الفجر بتوقيت الرحلة:

الاجنبي الاولاد والاب لابسين جاهزين والاغراض في السياره.

ربعنا: الاولاد باقي مواصلين (ماينلامون مو مصدقين), الام باقي تقرب باقي القدور , والاب باقي نايم وكل مايصحونه يقول ماجيت من السوق الا اخر الليل.


النفسيات في السيارة:

الاجنبي وناسه وضحك والاولاد فرحانيين وعارفين المنتزه اللي رايحين له .

ربعنا: الاب لابس ثوب نوم والاخلاق في راس خشمه واللي في امه خير يكلمه كأنه تندم انه يبي يطلع الاولاد ,الاولاد فرحانيين مو مصدقين بس كل شوي يسألون امهم : اي منتزه طالعين. وهي تسكتهم تقول بوكم يعرف لاتزعجونه معصب (مسكينه ماتنلام تعرف زوجها نكدي). ابشركم بعد نص ساعه بدت تفتح الموجه مع الاب


موقع الرحلة:

الاجنبي نزل ترامس الشاي والعصير والسندوشات الخفيفه وافطوا وبدو يلعبون.

ربعنا : ساعه حتى اختار المكان , وبدت اعمال التنزيل (لاتنسون فيه تيس يعني الرجال باقي بيذبح) من قدور الى اسطوانه غاز للزل للمراكي لل..... وتطول القائمة


الساعه8 صباح :

الاجنبي : باقي يلعب مع اولاده

ربعنا : ريحة الكشنه والكبده مغطيه المنتزه ... الاولاد باقي يرتبون.,,,,,المهم ربعنا افطروا


تمر سيارة ايس كريم:

الاجنبي يسابق اولاده على الايس كريم ويشتري لهم (جو مرح)

ربعنا: الاب من يشوف السياره تقول شايف الشيطان ,يصيح من بعيد(انقلللللللللللللللللللللللللع) اولاده من الخرعه تقول كوماندوز كلن يتخبى ورا شجره والا حجر.


وقت الغدا والعصريه:

الاجنبي طلع اسياخ الكباب والمشاوي اللي مجهزينها من اول ومطلعين البيبسي والكتشب , الشوي جنبهم وياكلون وهم مستانسين. وبعد الغدا ريحوا شوي وكملوا مرحهم الى قبل المغرب

ربعنا: معاهم قدر من كبره لو يسقط فيه التيس وهو حي مات , وكل شوي نسينا الملح لا نسينا البهار وانواع الهواش.

تغدوا بس ياحسره الام جالها براد في راسها لانها نسيت بعض الاغراض, الاب طبعا معه الجريده وبعدها

خذاله نومه والاولاد رجعوا يلعبواحتى قبل المغربيه.


قبل المغرب:

الاجنبي لموا اغراضهم ورتبوها وحركوا وهم مبسوطين

ربعنا: حملوا الاغراض واذن المغرب وهم باقي !!! جالسين يدورون براد الشاهي (اللي طق براس الام) وفلان ضايع وفلان في البر<<<<< بعد غاره سريعه من الاب على الام والاولاد ينضبط الجميع في السياره.

فيه شي مشترك بين الاثنين وهو ان الاب راح يسأل هذا السؤال: عسى انبسطتوااااااااااااا؟

انا اترك الاجابه لكم, وش تتوقع/تتوقعين تكون اجابه اولاد ؟؟؟؟؟


ملحوظة:

ممكن اكون بالغت شوي , بس اتمنى اني وصلت فكره معينه ممكن يستفيد منها اي واحد.

يسلمووووووووووو.........,,,,,,,,,,,,,,,,,,,,,,,,,

مشكوووووووووور